2018-2019 оқу жылына арналған оқушылар арасында дұрыс тамақтануды насихаттау жөніндегі іс-шаралар жоспарына сәйкес «Салауатты өмір салтын ұстану денсаулық пен ұзақ ғұмырға апарар жол» атты конференциясының өтілуі жайында
«Тазалық - саулық негізі, саулық байлық негізі»
Қазақтың халық мақалы
Адамның басты байлығы – денсаулық. Денсаулығымыз – байлықтан да қымбат. Біз үшін денсаулықтан артық бағалы нәрсе жоқ. Денсаулығымыз жақсы болу үшін салауатты өмір салтын қалыптастырудың маңызы зор. Тәуелсіз еліміздің тірегі болар жас ұрпақтың дені сау болса ғана биік шыңдарға қолы жетері, халқына қызмет етері даусыз.
Осы орайда мектебімізде 2018-2019 оқу жылына арналған оқушылар арасында салауатты өмір салтын ұстануды және дұрыс тамақтануды насихаттау жөніндегі жеке іс-шаралар жоспары құрылған болатын.
Елбасымыз Н.Ә.Назарбаев өзінің «Қазақстан - 2030 Барлық Қазақстандықтардың өсіп-өркендеуі, қауіпсіздігі және әл-ауқатының артуы» жолдауының 4-ұзақ мерзімді басымдық тармағында: «Салауатты өмiр салтын ынталандыру әрқайсымыздың дене тәрбиесiмен айналысуымызға, дұрыс тамақтануымызға, есiрткiлердi, темекi мен алкогольдi тұтынуды қойып, тазалық пен санитария шараларын сақтауымызға және т.с.с. бағытталған.Салауатты өмiр салты мен дұрыс тамақтануды, тазалық пен санитария ережелерiн насихаттайтын пәрмендi ақпараттық iс-шаралар жүргiзiлуi қажет» - деген сөзін басты назарда ұстап, мектебіміздің ұранына айналдырдық десе де болады. Бүгінгі таңда мектебіміздің аса маңызды міндеттерінің бірі – оқушылардың салауатты өмір сүруге көзқарасын қалыптастыру, олардың денсаулығын сақтауға, қоршаған ортасын таза ұстауға және жоғары, сапалы білім алып, сол білімді келешектегі өмірінде салауатты қадам жасауда пайдалана білуге тәрбиелеу.
Осы жүктелген міндеттерді жүзеге асыру мақсатында, дені сау,
денешынықтыру және спортпен шұғылданатын тәні сау ұрпақ тәрбиелеу мақсатында мектебімізде іс-шаралар үнемі өткізіліп тұрады.
Сондай іс-шаралардың бірі 2019 жылдың қаңтар айының 31 жұлдызында Б.Құндақбаева атындағы №1 орта мектебінде 2018-2019 оқу жылына арналған оқушылар арасында дұрыс тамақтануды насихаттау жөніндегі іс-шаралар жоспарына сәйкес 8-11 сынып оқушыларымен мектеп АКТ залында «Салауатты өмір салтын ұстану денсаулық пен ұзақ ғұмырға апарар жол» атты коференциясы болды.
Конференция мақсаты: мектеп жасындағы оқушыларға денсаулықты сақтаудың басты жолдары – зиянды, жаман әдеттерден аулақ болуды насихаттау, дұрыс тамақтану, салауатты өмір салтын сақтау туралы білімдерін нығайту.
Іс шараға конференция үйлестірушісі әлеуметтік-педагог Ш.Агламова, «ЖИТС ОАҚ» орталығынан дәрігер-эпидемиолог Дархан Серікболатұлы, Көксу аудандық орталық ауруханасынан аға медбике Күлсейітова Салтанат Ерсейітқызы және нарколог Сатова Нұрбақыт Жалғасқызы, мектеп медбикесі Г.Тажеманова, педагог-ұйымдастырушы А.Көкенов қатысты.
Конференция отырысы басталмас бұрын қатысушыларға қазіргі таңдағы жастар арасында орын алған әлеуметтік індет туралы, нашақорлық, маскүнемдік, темекі шегу, фаст-фуд тақырыптарына арналған бірнеше бейне роликтер көрсетілді.
Конференция барысында Көксу аудандық орталық ауруханасының наркологі Сатова Нұрбақыт Жалғасқызы оқушылар арасында ашық әңгіме жүргізіп, жастар арасында нашақорлықтың туындауына әсер ететін, ересек көрінуге тырысу, еліктеушілік, ата - ана тарапынан салғырттық, үлкендердің көрсететін жаман үлгілері сияқты біршама себептер мен салдары туралы сөз қозғап, оқушылар ойын тыңдады.Одан басқа осынау індеттерден арылудың көптеген жолдары ұсынылып, алдын - алудың шаралары талқыланды.
Келесі кезекте дәрігер-эпидемиолог Дархан Серікболатұлы оқушылардың назарына «Жүре пайда болған иммундық дефицитінің синдромы» ақпараттық бейнеролик көрсетіп, бұл аурудың жұғу жолдары, ЖИТС жұғудан қалай сақтану керектігі, профилактиканың басты міндеті жайлы ақпараттар беріп, үндеу парақтарын таратып, және өзі қызмет атқаратын ЖИТС орталығы акционерлік қоғамдастығының қандай бағыттарда жұмыс істейтіндігі жайында айтып өтті. Сонымен қатар Алматы облысы бойынша жасөспірімдер мен ересектер және қарттар арасында осы инфекцияның таралуы бойынша статистикалық пайыздық мәліметтер беріп өтті. Дархан Серікболатұлы өзінің түсіндіру жұмыстарын аяқтағаннан кейін оқушыларда қаншалықты деңгейде ЖИТС туралы білімдерінің қалыптасқандығын білу мақсатында оқушылардан сауалнама алды.
Көксу аудандық орталық ауруханасының аға медбикесі Күлсейітова Салтанат Ерсейітқызы, арнайы дайындап келген «Правила правильного питания школьников» тақырыбындағы баяндамасында оқушыларға салауатты өмір салтын ұстануға, пайдалы тағамдар және зиянды тағамдар жөнінде кеңестер беріп, дұрыс тамақтанудың ережелері, дұрыс тамақтанудың негізгі шарттары туралы айтып өтті.
Өткізілген конференция барысында сындарлы диалог өрбіп, оның нәтижесінде оқушылар арасында салауатты өмір салтын насихаттау мен дамыту жұмысын одан әрі жетілдіру бойынша бір қатар ұсыныстар айтылып, оқушылардан кері байланыс алынып, қортынды шығарылды.
Конференция бағдарламасына сай жоспарланған іс-шаралар өз деңгейінде өтті.
Адам денсаулығының мән-маңызына қазақ халқы ежелден аса көңіл бөлген: күнделікті өмірде денені күтіп ұстауға, тазалық сақтауға, дұрыс тамақтануға да өте қатты мән берген. Қазақ халқының «Бірінші байлық – денсаулық», «Дені саудың – жаны сау», «Жаны саудың – тәні сау» деген мақал-мәтелдері адам денсаулығын күтуде терең тәрбиелік және философиялық маңызын осы күнге дейін жойған жоқ.
Дүниежүзінің өркениетті елдерінің барлығында дерлік халық денсаулығы, әсіресе жастардың денсаулығы басты ұлттық құндылық және мемлекететтік саясаттың басым бағдары болып табылатынын баса айтқымыз келеді.
Салауатты өмір салтын ұстанайық, жастар!
Б.Құндақбаева атындағы №1 орта
мектебінің әлеуметтік-педагогы
Агламова Шарбану Болатжанқызы